Ուսումնական Նոր Տարեշրջանի Բացման Հանդիսաւոր Արարողութիւնը Հբըմ Մանուկեան-Տէմիրճեան Ամենօրեայ Վարժարանին Մէջ

Օգոստոս 19-ին, ՀԲԸՄ Մանուկեան-Տէմիրճեան Ամենօրեայ Վարժարանին մէջ տեղի ունեցաւ 2026-2027 ուսումնական տարեշրջանի բացման հանդիսաւոր արարողութիւնը՝ հոգեւոր եւ կրթական ջերմ մթնոլորտի մէջ։

Այս առիթով վարժարան այցելեց Թեմիս Բարեխնամ Առաջնորդ Գերշ. Տ. Յովնան Արք. Տէրտէրեան, ընկերակցութեամբ Ս. Պետրոս Եկեղեցւոյ Հոգեւոր Հովիւ Արժ. Տ. Շնորհք Աւագ Քահանայ Տէմիրճեանի եւ Օգնական Հովիւ Արժ. Տ. Գեւորգ Քահանայ Աբեանի։

Հանդիսութեան ընթացքին Սրբազան Հայրը իր հայրական օրհնութեան խօսքը ուղղեց Խնամատար Մարմնի անդամներուն, տնօրէնութեան, ուսուցիչներուն, ծնողներուն եւ աշակերտներուն՝ նոր ուսումնական տարեշրջանի առիթով։ Ան իր խօսքին մէջ շեշտեց կրթութեան կարեւորութիւնը՝ յատկապէս մեր ազգային եւ հոգեւոր ինքնութեան պահպանման ու նոր սերունդներուն փոխանցման գործին մէջ։

Սրբազան Հօր խօսքը միաժամանակ քաջալերանքի եւ յոյսի պատգամ էր աշակերտներուն՝ յորդորելով զիրենք ուսման մէջ ըլլալ աշխատասէր, պատասխանատու եւ նպատակասլաց, իսկ իրենց կեանքին մէջ՝ բարի, ազնիւ եւ Աստուծոյ հանդէպ հաւատարիմ։ Ան ընդգծեց, որ դպրոցը միայն գիտելիք ձեռք բերելու վայր մը չէ, այլ նաեւ այն միջավայրն է, ուր կը կերտուի երիտասարդի բնաւորութիւնը, կը զարգանայ անոր պատասխանատուութեան զգացումը եւ կը ձեւաւորուի անոր կապը իր հաւատքին, եկեղեցւոյ եւ ազգային ժառանգութեան հետ։

Նոր ուսումնական տարեշրջանի սկիզբը նաեւ առիթ էր գնահատելու ուսուցիչներու նուիրեալ ծառայութիւնը եւ ծնողներու կարեւոր դերը՝ իրենց զաւակներու կրթութեան եւ դաստիարակութեան մէջ։ Սրբազան Հայրը իր օրհնութիւնը փոխանցեց բոլոր անոնց, որոնք իրենց ծառայութեամբ եւ նուիրումով կը մասնակցին հայ նոր սերունդի կերտման սրբազան առաքելութեան։

Նոր ուսումնական տարեշրջանի այս սկիզբը գեղեցիկ առիթ մըն էր անգամ մը եւս ընդգծելու, թէ կրթութիւնը եւ հաւատքը միասին կը կերտեն ամուր, գիտակից եւ արժէքներու տէր սերունդ մը։ Վարժարանը միայն գիտելիքի փոխանցման վայր չէ, այլ այն միջավայրն է, ուր մեր զաւակները կը սորվին սիրել Աստուած, իրենց ընտանիքը, իրենց եկեղեցին, իրենց լեզուն ու մշակոյթը եւ պատասխանատուութեամբ ծառայել իրենց ժողովուրդին։