Յայտնի է մեր հաւատացեալ հայորդիներուն, որ Գարեգին Բ կաթողիկոսի տնօրինութեամբ և օրհնութեամբ ստեղծուած է Ս. Էջմիածնի Մայր Տաճարի վերանորոգութեան յանձնախումբ, որու ատենապետն է Տ. Յովնան Արք. Տէրտէրեան: Սրբազան Հայրը լայնօրէն լծուել է նուիրահաւաքի աշխատանաց կազմակերպմանը, և այդ նպատակով նախորդ շաբաթ շարք մը այցելութիւններ ունեցաւ Հարաւային Ամերիկայի հայոց թեմերը։

Օգոստոս 29-30-ի օրերուն Յովնան Սրբազանը գտնուեցաւ Սան Փաուլօ և ապա Օգոստոս 31 – Սեպտեմբերի 1-ին Պուէնոս Այրէս:

Նախ, Հինգշաբթի՝ 29 Օգոստոսը տրամադրուեցաւ բարերար Անդրէ Քսաչիքեանի ընտանիքին, մասնակցելով անոր հօր՝ Անդրանիկ Քսաչիքեանի թաղմանական արարողութեանը։

Օգոստոսի 30-ին՝ այցի երկրորդ օրը, Հայաստանի Հանրապետութեան հիւպատոսարանի մէջ տեղի ունեցաւ բարի գալստեան ընդունելութիւն Տիկին Պուրմայեանի հրաւէրովը, ուր հրաւիրուած էին համայնքի բոլոր պատասխանատուները՝ գլխաւորութեամբ թեմակալ Առաջնորդ Գերշ. Տ. Նարեկ Եպիսկոպոս Պէրպէրեանի։ Այս ընդունելութեանը Սրբազան Հայրը հանգամանօրէն ներկայացրեց Ս. Էջմիածնի Մայր Տաճարի վերանորոգութեան ծրագիրը։ Խօսքերով հանդէս եկան նաև Առաջնորդ սրբազանն ու Անդրէ Քսաչիքեան, որ հրաւէր յղեցին՝ մասնակցելու յառաջիկային կազմակերպուելիք երկու ընդունելութիւններուն, որոնց առիթը նուիրահաւաքը պիտի ըլլայ։

Յաջորդ հանգրուանը Պուէնոս Այրէսն էր։ Տ. Յովնան Արքեպիսկոպոսը այստեղ առաջին օրը ունեցաւ հանդիպում Առաջնորդ սրբազանի և թեմական խորհուրդի հետ և պատշաճօրէն ներկայացրեց այցելութեան նպատակը։ Շաբաթ՝ 31 Օգոստոսին, երեկոյեան պաշտօնապէս այցելեց ՀԲԸՄիութիւն և հանդիպում կայացաւ վարչութեան հետ։

Կիրակի՝ 1 Սեպտեմբերին Սրբազան Հայրը Ս. Պատարագ մատուցեց Առաջնորդանիստ եկեղեցւոյ մէջ: Այստեղ նաև ցուցադրուեցաւ Շողակաթի կողմէ պատրաստուած տեսերիզը։ Յովնան Սրբազանը «Տակաւին հաւատք չունի՞ք» բնաբանով քարոզին մէջ հանգամանօրէն խօսեցաւ Ս. Էջմիածնի Մայր Տաճարի վերանորոգութեան մասին:

«Մայր Տաճարի վերանորոգութիւնը մեր և՛ պարտքն է, և՛ պատիւը», ի մասնաւորի իր խօսքին մէջ ըսաւ Յովնան Սրբազանը։

«Ս. Էջմիածինը այն սրբազան տեղն է, ուր Աստուած իջաւ և հանդիպեց մեր ժողովուրդին, և այդ պահէն սկսած մենք դարձանք առաջին քրիստոնեայ պետութիւնը աշխարհի երեսին, որ քրիստոնէութիւնը ընդունեց որպէս պաշտօնական պետական կրօն։ Եւ 301 թուականէն սկսեալ Ս. Էջմիածին դարձաւ մայրը մեր ժողովուրդին, որովհետև մեր ազգի զաւակներուն բաշխեց և՛ հոգևորը, և՛ ազգայինը»,

Մանրամասն ներկայացնելով Մայր Տաճարին վեգրանորոգութեան անյետաձգելի անհրաժեշտութիւնը՝ Սրբազան Հայրը նաև նշեց, որ «Ամէն օր աւելիով պիտի լծուինք աշխատանքի, ու հազարապատիկ պիտի քարոզենք Ս. Էջմիածնի մասին։ Երբէք ընկրկիլ չկայ։ Միայն հարկ է արթնութիւն ստեղծել ամենուրէք կամ առաւել աշխուժացնել կապը Ս. Էջմիածնի հետ»:

Հարաւային Ամերիկա այցելութիւնը իր աւարտին հասաւ Սեպտեմբեր 2-ի առաւօտեան Պուէնոս Այրէսի մէջ վարչական անդամներու հետ հանդիպմամբ, որու ընթացքին նուիրահաւաքի վերաբերեալ աշխատանքի յստակ ուղեգիծ ներկայացուեցաւ։

Ս. Էջմիածնի Մայր Տաճարի վերանորոգութեան նուիրահաւաքի յանձնախմբի ատենապետ Յովնան Սրբազանը, վերանորոգութեան բարեայաջող ընթացքն ապահովելու համար, իր յորդորը կը յղէ հաւատացեալ հայորդիներուն. «Ս. Էջմիածինը հայրենի հողին հետ միաձոյլ դարձած անժամանակին մէջ ապրող յաւերժութիւնն է։ Մեր մէջ է հաւատքին գիտակցութիւնն ու ոյժը, կեանքի կոչենք այն, և այն ժամանակ երկնքի մէջ մեր նահատակաց հոգիները պիտի հրճուին և իրենց յարուցեալ կեանքը տեսնեն մեր մէջ՝ վերանկախացեալ Մայր հայրենիքով, հզօր եկեղեցիով և ազատատենչ մեր ժողովուրդով»:

ԴԻՒԱՆ ԱՌԱՋՆՈՐԴԱՐԱՆԻ

Սեպտեմբեր 5, 2019

Պըրպենք