St. Leon Church "Sound of Children" Summer Camp
Click Here to lean more

NEXT EVENT
17 October 2019
Համատեղ աղօթք ընտանիքների ամրութեան համար
Published - 10 October 2019

Ընտանիքի տարուայ շրջանակներում, հոկտեմբերի 9-ից 10-ը, Մայր Աթոռ Սուրբ Էջմիածնում տեղի ունեցած «Եկեղեցին եւ ընտանիքը 21-րդ դարում. արժէքներ եւ մարտահրաւէրներ» միջազգային համաժողովի առիթով հոկտեմբերի 10-ին Սուրբ Գայանէ վանքում, հանդիսապետութեամբ Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսի, կատարուեց համատեղ աղօթքի արարողութիւն ընտանիքների զօրացման եւ ընտանեկան սրբազան արժէքների պահպանման համար:

Սրբազան արարողութեանը ներկայ էին Քոյր Եկեղեցիների ներկայացուցիչներ, միջազգային համաժողովի մասնակիցները, Մայր Աթոռ ժամանած բազմազաւակ ընտանիքներ եւ այլ բարեպաշտ ուխտաւորներ:

Աղօթքից յետոյ ներկայ ժողովրդին իր հայրապետական պատգամն ու օրհնութիւնը բերեց Նորին Սրբութիւն Գարեգին Երկրորդ Ամենայն Հայոց Կաթողիկոսը:

 

Ն.Ս.Օ.Տ.Տ. ԳԱՐԵԳԻՆ Բ ԱՄԵՆԱՅՆ ՀԱՅՈՑ ԿԱԹՈՂԻԿՈՍԻ ԽՕՍՔԸ

«ԵԿԵՂԵՑԻՆ ԵՒ ԸՆՏԱՆԻՔԸ 21-ՐԴ ԴԱՐՈՒՄ. ԱՐԺԷՔՆԵՐ ԵՒ ՄԱՐՏԱՀՐԱՒԷՐՆԵՐ» ՄԻՋԱԶԳԱՅԻՆ ՀԱՄԱԺՈՂՈՎԻ ՄԱՍՆԱԿԻՑՆԵՐԻ ՀԵՏ ՀԱՄԱՏԵՂ ԱՂՕԹՔԻ ԸՆԹԱՑՔԻՆ

 

Միջազգային գիտաժողովի մեծարգոյ մասնակիցներ,

Սիրելի հաւատաւոր զաւակներ մեր,

Հոգեւոր գոհունակութեամբ ենք ողջունում ձեզ ամէնքիդ Սուրբ Գայանէ եկեղեցում՝ միջազգային  գիտաժողովի շրջանակներում կատարուող միասնական աղօթքի այս պահին։ Աղօթեցինք մեր Ամենակալ Հօրը՝ ընտանիքի ու ընտանեկան սիրոյ զօրացման, ընտանեկան սրբազան արժէքների պահպանման եւ ծառացող նորանոր մարտահրաւէրների յաղթահարման համար։ Հեշտ չէ սրբազան ու անանց հոգեւոր արժէքների յարաբերականացման մտայնութեամբ կլանուած արդի աշխարհում պայքարել նուիրական ու անձեռնմխելի այնպիսի արժէքի եղծման դէմ, ինչպիսին մեզ՝ քրիստոնեաներիս համար ընտանիքն է։ Սակայն Եկեղեցու առաքելութիւնն է քրիստոնէական ընտանիքի զօրացումն ու ամրապնդումը, Եկեղեցին է այն գրաւականն ու հիմքը, որի վրայ անխախտօրէն հիմնւում է քրիստոնէական ընտանիքի աստուածապարգեւ  գաղափարը: Այս ճանապարհին մենք յաջողելու ենք միայն ու միայն մեր Տիրոջ զօրացնող ներկայութեամբ ու կենարար խօսքով. «Մի՛ վախեցիր, այլ միայն հաւատա» (Մարկ. Է 36)։

Քրիստոնէական ընտանիքը՝ իբրեւ աստուածահաստատ իրողութիւն, այսօր արդէն բոլոր քրիստոնեաներին միաւորող կարեւորագոյն հասկացութիւն է, խորհրդանշական կերպով՝ Աստծոյ՝ Երկնաւոր մեր Հօր համամարդկային ընտանիքի արտացոլումը մեր կեանքում եւ մեր հասարակութեան մէջ։ Այս առումով այն նաեւ ամէնքիս պաշտպանութեան եւ խնամքի կարիքն ունի՝ իբրեւ հոգեւոր արժէքների ու բարոյական սկզբունքների կերտման դարբնոց, աւետարանական ճշմարտութիւնները կեանքի կոչելու նուիրական ճանապարհ։ Պատահական չէ, որ քրիստոնէութեան արշալոյսին հեթանոսաց առաքեալ Սուրբ Պօղոսն ընտանիքի ու ընտանեկան արժէքների ուրացումն ուղղակիօրէն համարժէք էր համարում հաւատուրացութեանը. «Իսկ եթէ մէկը իւրայիններին եւ մանաւանդ ընտանիքին խնամք չի տանում, հաւատն ուրացել է եւ աւելի չար է, քան անհաւատը» (Ա Տիմոթ. Է 8)։ Յիրաւի, անկարելի է ընկալել քրիստոնէութիւնն ու Քրիստոսի Եկեղեցին առանց ընտանիքի եւ ընտանեկան արժէքների, որոնց հիմքն աստուածային գերագոյն առաքինութիւնն է՝ սէրը, գոյութեան գրաւականը՝ հաւատը, ներշնչող խնամքը՝ յոյսը։ Քրիստոնէական առաջին համայնքները ստեղծուել են ընտանիքներում, ընտանեկան սեղանի շուրջ են առաջին քրիստոնեաները մատուցել առաջին Սուրբ Պատարագները, ընտանեկան օջախներում են սերմանուել երկնաւոր մեր Վարդապետի փրկչական պատգամի սերմերը՝ ծլարձակելով ու հզօր արմատներով տարածուելով իբրեւ քրիստոնէական մեծ ու միասնական ընտանեկան ծառ։

Սիրելիներ, Տիրոջից ամէնքս պատգամ ունենք՝ նախանձախնդիր մնալու նուիրականութեանն ու ամրութեանն ընտանիքի, անխաթար պահպանելու աստուածահաստատ ընտանիք հասկացութիւնը, նրա սրբութիւնը, ազգային աւանդոյթները, խնամելու ու բարձրացնելու մեր հոգեւոր ու ազգային կեանքը՝  մշտապէս մնալով Տիրոջ որդեգրութեան շնորհի մէջ՝ որպէս հաւատաւոր մէկ ընտանիք, որպէս Աստծոյ սեփական ժողովուրդ:

Ի խորոց սրտի աղօթում ենք, որ Ամենակալն Աստուած Իր խնամքի ու սիրոյ մէջ պահի ու պահպանի ընտանիքները եւ ողջ աշխարհին, համայն մարդկութեանը շնորհի Իր երկնառաք խաղաղութիւնը, գթութիւնն ու ողորմութիւնը այսօր եւ միշտ. ամէն:

Print