St. Leon Church "Sound of Children" Summer Camp
Click Here to lean more

NEXT EVENT
17 October 2019
Մայր Աթոռում սկսուեց «Եկեղեցին եւ ընտանիքը 21-րդ դարում. արժէքներ եւ մարտահրաւէրներ» միջազգային համաժողովը
Published - 10 October 2019

Հոկտեմբերի 9-ին, Ընտանիքի տարուայ շրջանակներում, Մայր Աթոռ Սուրբ Էջմիածնում, օրհնութեամբ Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսի, իր աշխատանքը սկսեց «Եկեղեցին եւ ընտանիքը 21-րդ դարում. արժէքներ եւ մարտահրաւէրներ» խորագրով միջազգային համաժողովը:

Համաժողովին մասնակցում էին Մայր Աթոռի միաբաններ, Քոյր Եկեղեցիների ներկայացուցիչներ, պետական այրեր, գիտնականներ եւ հասարակական գործիչներ Հայաստանից, Ռուսաստանից, Իռլանդիայից, Աւստրիայից, Բելգիայից եւ Ֆինլանդիայից:

Համաժողովը սկսուեց «Վաչէ եւ Թամար Մանուկեան» Մատենադարանում Տէրունական աղօթքով, որից յետոյ ներկաներին ողջունեց Մայր Աթոռի դիւանապետ, համաժողովի կազմակերպիչ յանձնախմբի ատենապետ Գերաշնորհ Տ. Արշակ եպիսկոպոս Խաչատրեանը:

«Ակնյայտ է, որ ընտանիքը առանցքային նշանակութիւն ունի Եկեղեցու առաքելութեան մէջ: Զօրացնել քրիստոնէական ընտանիքները նշանակում է ամրացնել Եկեղեցու հիմքերը եւ կենսագործել հզօր հայրենիքի ու բարոյապէս առողջ ու կենսունակ հասարակութիւն կերտելու տեսիլքը», - ընդգծեց Արշակ եպիսկոպոսը:

Այնուհետեւ համաժողովի մասնակիցներին իր հայրապետական օրհնութիւնն ու պատգամը փոխանցեց Նորին Սրբութիւն Գարեգին Երկրորդ Ամենայն Հայոց Կաթողիկոսը:

«Գերաշնորհ, հոգեշնորհ, արժանապատիւ հայրեր,

Մեծայարգ տիարք եւ տիկնայք,

Սիրելի ներկաներ,

Ողջունում ենք ձեզ Մայր Աթոռ Սուրբ Էջմիածնում եւ բերում Հայրապետական Մեր օրհնութիւնը: Ուրախ ենք այս ժողովին ձեր մասնակցութեան համար: Այսօրինակ համաժողովները, հաւատում ենք, կարեւոր նպաստ են բերելու ընտանիքի առջեւ ծառացած մարտահրաւէրների դիմագրաւման եւ հոգեւոր ու բարոյական արժեհամակարգի անաղարտ պահպանութեան ու ամրապնդման գործում: Մեր գնահատանքն ենք բերում Ռուս Ուղղափառ եւ Կաթոլիկ Եկեղեցիների ներկայացուցիչներին, ովքեր ընտանիքների հետ հովուական աշխատանքի իրենց փորձառութիւնը պիտի կիսեն մեզ հետ:

Արդի աշխարհում վտանգւում են ընտանիքի եւ նրա առաքելութեան մասին ընկալումները: Տարածում են գտնում ընտանիքի նուիրական գաղափարը աղճատող եզրոյթներ եւ հասկացութիւններ, որոնք ներկայացւում են իբրեւ ժամանակակից կեանքի թելադրանքներ: Մտայնութեան ու բարքերի այսօրինակ այլափոխումը յաճախ քօղարկւում է անհատի ազատութեան եւ իրաւունքների լոյսի ներքոյ՝ խեղաթիւրելով ընտանեկան կեանքի իրական արժէքն ու բացառիկութիւնը:

Եկեղեցու տեսակէտները ընտանիքի վերաբերեալ հիմնուած են ոչ թէ մարդկային փոփոխուող կենսակերպի եւ մտայնութիւնների, այլ Աստծոյ կենարար խօսքի ու յայտնութեան վրայ: Ընտանիքի մասին քրիստոնէական վարդապետութիւնը ձեւաւորուել է աստուածադիր օրէնքի համաձայն՝ հաստատելով ամուսնութեան սրբութիւնն ու արժէքը (Եբր. ԺԳ 4): Սուրբ Գիրքը յստակ ընդգծում է ամուսնութեան եւ ընտանիքի նուիրականութիւնն ու նպատակները: Աստուած ստեղծեց մեր նախածնողներ Ադամին եւ Եւային այր ու կին (Ծննդ. Ա 28): Տղամարդու եւ կնոջ միութեան սրբագործութեամբ Տէրն ընտանիքը դարձրեց նուիրական օջախ, որի հարկից ներս արարչագործութիւնն է շարունակւում: Եկեղեցին Սուրբ Պսակի խորհրդով օրհնում է ընտանիքի կազմութիւնը: Պսակադրութեան արարողութեամբ հռչակւում է ընտանիքի անբաժանելի եւ անքակտելի միութիւնը, որը նուիրագործւում է աստուածային ներգործութեամբ ու շնորհներով:

Ընտանիքի սրբութեան վերաբերեալ Եկեղեցու պատգամը մենք կարիքն ունենք հասցնելու իւրաքանչիւր անհատի սրտին եւ մտքին: Ընտանիքը Աստծոյ օրհնութիւն է եւ հիմքն ու մանրակերտը հասարակութեան, մարդկային ազնիւ ու վեհ յարաբերութիւնների: Ընտանիքը իւրօրինակ եկեղեցի է, որի հարկից ներս ծնողների սպասաւորութեամբ սկիզբ է առնում աստուածճանաչողութեան, տէրունական պատգամների, օրինապահութեան, սիրոյ, նուիրուածութեան ճանապարհը: Ընտանեկան հոգածու միջավայրում է հասակ առնում երեխան, եւ նրա մտքում ու հոգում ձեւաւորւում է հասարակութեան անդամը լինելու գիտակցութիւնը: Ընտանիքի աստուածահաստատ պատկերի խաթարմամբ խախտւում է երեխայի իրաւունքը՝ մեծանալու իր հօր եւ մօր սիրոյ ու դաստիարակութեան ներքոյ, նմանութեամբ աւետարանական օրհնեալ ու նուիրական Սուրբ Ընտանիքի:

Ներկայ ժամանակների լրջագոյն մտահոգութիւններից է նաեւ ընտանիքների քայքայումը, ամուսնալուծութիւնը, որը զգալի թիւ է կազմում աշխարհում, ներառեալ մեր երկրում՝ Հայաստանում: Անյանգստացնող այս իրողութեան պատճառները տարբեր են՝ սոցիալական, տնտեսական, բարոյական, նաեւ տեխնոլոգիաներից կախուածութիւնը, որը վնասում է ընտանիքում միջանձնական յարաբերութիւններին: Այս մարտահրաւէրների համատեքստում Մենք կարեւորում ենք համագործակցութիւնը պետութեան հետ՝ ի նպաստ ընտանիքների պահպանման ու ամրապնդման եւ առկայ սպառնալիքների կանխարգելման: Յիրաւի, ամուր եւ քրիստոնէական արժեհամակարգ կրող ընտանիքը նշանակում է երկրի, պետութեան երաշխաւորուած ապագայ:

Ընտանիքի առջեւ ծառացած հիմնախնդիրները վեր հանելու, անդրադարձ  կատարելու եւ յաղթահարելու տեսլականով Մենք 2019 թուականը հռչակեցինք Ընտանիքի տարի, որպէսզի այդ առումով իրագործուէն առաւել նպատակային քայլեր ու նախաձեռնութիւններ: Մեր Սուրբ Եկեղեցու հովիւները համայնքներում գնահատելի սպասաւորութիւն են մատուցում ընտանիքների ամրութեան ու զօրացման ուղղութեամբ: Մայր Աթոռ Սուրբ Էջմիածինը իրականացնում է մի շարք սոցիալական ծրագրեր: Մայր Աթոռի Միաբանական ժողովի մասնակիցներն այցելել են Հայաստանի տարբեր շրջաններում ապրող կարիքաւոր ընտանիքներին՝ բերելով իրենց օրհնութիւնն ու Եկեղեցու նիւթական աջակցութիւնը: Մենք նոյնպէս Մեր հանդիպումներում, Մեր քարոզներում ու խօսքերում անդրադառնում ենք ընտանեկան խնդիրներին: Առաջիկայ ամիսներին ծրագրում ենք նոր հանդիպումներ, յատկապէս՝ բազմազաւակ ընտանիքների հետ: Այս ծրագրերը շարունակական են, որոնց ընթացքը պիտի նշանաւորուի ամավերջին ընտանիքների օրհնութեան յատուկ արարողութեամբ:

Մեր մաղթանքն է, որ միջազգային այս համաժողովը՝ գումարուած «Եկեղեցին եւ ընտանիքը 21-րդ դարում. արժէքներ եւ մարտահրաւէրներ» խորագրով, իր նպաստը բերի հասարակութեան մէջ ընտանիքի նուիրագործուած ընկալման զօրացմանը: Վերստին Մեր օրհնութիւնն ու գնահատանքը բերելով համաժողովի կազմակերպիչներին եւ բանախօսներին՝ աղօթք ենք բարձրացնում առ Աստուած, որ օրհնի մեր այս համաժողովը, Սուրբ Հոգու շնորհներով առաջնորդի մեզ եւ արդիւնաւորի ընտանիքների ամրապնդմանն ու անխաթար պահպանմանն ուղղուած ջանքերը:

Բարի ընթացք համաժողովի աշխատանքներին: Թող մեր Տիրոջ շնորհները, սէրն ու խաղաղութիւնը լինեն ողջ աշխարհի եւ մարդկութեան հետ այսօր եւ միշտ. ամէն», - ասաց Վեհափառ Հայրապետը:

Համաժողովին «Քրիստոնէական ընտանիք եւ ժամանակակից մարտահրաւէրներ» եւ «Եկեղեցու եւ պետութեան դերը քրիստոնէական ընտանիքի պահպանութեան եւ զօրացման մէջ» թեմատիկ բաժանմամբ նիստերին բանախօսութիւններով հանդէս կը գան Մայր Աթոռի դիւանապետ Գերաշնորհ Տ. Արշակ եպիսկոպոս Խաչատրեանը («Ամուսնութիւն. միութիւն, թէ՞ համակեցութիւն»), Վլադիկովկասի եւ Ալանիայի արքեպիսկոպոս, Հայաստանի Հանրապետութիւնում Ռուս Ուղղափառ Եկեղեցու համայնքների կառավարիչ Լէոնիդ արքեպիսկոպոս Գորբաչովը («Եկեղեցին եւ ընտանիքը 21-րդ դարում. արժէքներ եւ մարտահրաւէրներ» միջազգային համաժողովի առիթով»), Իռլանդիայի Լիմերիկի եպիսկոպոս, Գրիգորեան համալսարանի դասախօս, ա.գ.դ. Բրենդան եպիսկոպոս Լեհին (««Դուբլին 2018 ընտանիքների համաշխարհային ժողով». Ընտանիքներին տրամադրուած աջակցութիւնը արժէքների եւ աւանդոյթների փոփոխուող աշխարհում»), Աւստրիայի Գրացի համալսարանի դասախօս, պ.գ.դ. Մարտին Կուգլերը («Ամուսնութիւնն ու ընտանիքը Եւրոպայում եւ Հայաստանում. Մարտահրաւէրներ քրիստոնեաների համար այսօրուայ հանրային քննարկումներում»), Ռուսաստանի Պետական հումանիտար համալսարանի դասախօս, ՌԴ ԳԱ թղթակից անդամ, ս.գ.դ., պրոֆէսոր Ժան Տոշչենկոն («Ժամանակակից ընտանիքի պարադոքսները. Յոյսեր եւ իրականութիւն»), ՀՀ ԳԱԱ փիլիսոփայութեան, սոցիոլոգիայի եւ իրաւունքի ինսիտուտի գիտական ղեկավար, ՀՀ ԳԱԱ ակադեմիկոս, ս.գ.դ., պրոֆէսոր Գեւորգ Պողոսեանը («Հայկական ընտանիքը դարաշրջանների շրջադարձին»):

Ընդմիջումից յետոյ համաժողովը շարունակեց իր աշխատանքը: Զեկոյցներ ներկայացրեցին ՀՀ փաստաբանների պալատի նախագահ, ի.գ.թ. Արա Զոհրաբեանը («Ընտանիքը որպէս սահմանադրական ինստիտուտ եւ ազգային արժէք»), Գեւորգեան Հոգեւոր Ճեմարանի դասախօս Արժանապատիւ Տ. Ադամ քահանայ Մակարեանը («Ընտանիքը քրիստոնէական ընկալման եւ արդի գաղափարախօսութիւնների ու մարտահրաւէրների առջեւ»), «Ծնողական համառուսական դիմադրութիւն» ընտանիքի պաշտպանութեան համառուսական հասարակական կազմակերպութեան ղեկավար Մարիայ Մամիկոնեանը (««Գլոբալիզմի» մարտահրաւէրը ընտանիքի եւ քրիստոնէական մշակոյթի ինստիտուտի առջեւ: Պատասխան կը լինի՞»), «Յանուն քրիստոնէական ընտանիքի» նախաձեռնութեան ղեկավար, պ.գ.թ. Կարինէ Եսայեանը («Իրաւական եւ քարոզչական ոլորտներում քրիստոնէական ընտանիքին եւ ազգային-հոգեւոր արժեհամակարգին նետուած արդի մարտահրաւէրները»), Ֆինլանդիայի Հելսինկիի համալսարանի դասախօս, ք.գ.դ Եօհան Բեկմանը («Ընտանիքը որպէս այսօրուայ լիբերալ արժէքների քրէական առանձնայատկութիւն») եւ իրաւախորհրդատու, «Ազատութեան պաշտպանութեան» դաշինքի անդամ, ի.գ.դ. Ադինա Պորտարուն («Ամուսնութեանն ու ընտանիքին ուղղուած ժամանակակից իրաւաբանական եւ քաղաքականութեան մարտահրաւէրները»):

Հոկտեմբերի 10-ին համաժողովի մասնակիցները կ'այցելեն Ծիծեռնակաբերդի յուշահամալիր: Նոյն օրը երեկոյեան` ժամը 17:00-ին, Ս. Գայանէ վանքում կը մասնակցեն Երեկոյեան ժամերգութեան եւ ընտանիքների օրհնութեան արարողութեանը:

Print