30-ԱՄԵԱԿ ՍՈՒՄԿԱՅԻԹԻ ՀԱՅ ՆԱՀԱՏԱԿՆԵՐՈՒՆ
Published - 12 March 2018

2018 թուականը կը նշէ տխուր 30ամեակը այն Հայ Նահատակներուն,  որոնք զոհ գացին Ատրպեճեանի Սումկայիթ քաղաքին եւ մերձակայ շրջաններուն մէջ՝ Թուրք-Ատրպեճեանցի ամբոխներուն կողմէ Հայ բնակչութեան հանդէպ ծրագրուած եւ կազմակերպուած բարբարոս ոճրագործութեան (1988, Փետրուար 27-29ին): Ոճրագործական այդ արարքը թէեւ գործադրեցին ատրպենճեանցի ամբոխներ, սակայն այդ քայլը կը կրէր քաղաքական իշխանութիւններուն հովանաւորութիւնը եւ ծրագրուած ուղեգիծը: Զոհուեցան հարիւրաւոր անմեղ Հայեր, մեծ մասով կիներ, մանուկներ, տարեցներ եւ անոնց գոյքերը յափշտակուեցան: Հարազատ շարունակութիւն մը 1915ի Հայկական Ցեղասպանութեան...: Կատարուած ոճրագործութիւնը, անշուշտ, անպատիժ մնացած Թուրքերու քաղաքական Ոճրագործութեան հարազատ դրսեւորումն էր: Ատրպեճեանի իշխանութիւնները այդ ոճրագործութեամբ կը սպառնային իր մարդկային արդար իրաւունքներու պաշտպանութեան համար ոտքի ելած Արցախի Հայութեան: Սումկայիթի վայրագութիւնները անգամ մը եւս հաստատեցին Թուրք-Ատրպեճեանական իշխանութիւններուն ցեղասպան քաղաքականութիւնը:

Անկասկած, անոնց կատարածը բնորոշ է միայն անքաղաքակիրթ ժողովուրդներու:

Սումկայիթի այդ ոճրագործութեան օրերէն ասդին, անցած են 30 ձիգ տարիներ եւ ազգային մեր վէրքերը չեն սպիացած եւ տեղի ունեցած ոճրագործութիւնը մինչեւ այսօր չէ ստացած իր քաղաքական եւ իրաւական համարժէք գնահատականը: Սումկայիթը միջազգային գետնի վրայ կը մնայ դատապարտելի, որովհետեւ կատարուածը «ցեղասպանութիւն էր» եւ միջազգային յանցագործութիւն: Մենք պէտք է խօսինք մեր պատմութեան մասին, որպէսզի նաեւ կանխենք ապագայ նման ոճիրներու իրականացումը: 

Մեր Ժողովուրդին ազատութիւնը, հայրենի հողերուն վրայ ապրելու եւ ինքնութիւնը պահպանելու իրաւունքը կարելի չէ խլել սպառնալիքներով, զէնքի ու զինամթերքի բռնութեամբ եւ սպառազինութեամբ:

Սումկայիթի ջարդերուն քաղաքական կազմակերպիչները այսօր ալ կը շարունակեն սպառնալ Հայութեան եւ Հայաստանին: Այսօր, Ատրպեճեանի մէջ, Հայատեացութիւնը աւելի ուժգին է քան 30 տարիներ առաջ, որովհետեւ Ատրպեճեանի ամբողջ սերունդը մեծցած է այն համոզումով թէ Հայերը վայրագ թշնամիներ են: Սումկայիթի ոճիրը թէ՛ Հայ Ժողովուրդին եւ թէ՛ մարդկութեան նորագոյն պատմութեան ամէնէն ողբերգական էջերէն մէկն է...: 

Ճիշտ է թէ Սումկայիթի մէջ Հայ բնակչութեան դէմ ցուցաբերուած վայրագ դաժանութիւնը իր պատասխանը ստացաւ Արցախեան պատերազմով, սակայն, հարցերը չեն հասած իրենց քաղաքական եւ մարդկային աւարտին:

Այսօր, Սումկայիթի Հայ բնակիչներու նահատակութեան 30ամեակին առիթով, մեր աղօթքներուն հետ, կը հրաւիրենք մեր ժողովուրդը, որ յարմարագոյն ձեւերով ու միջոցներով, նաեւ միջազգային հանրութեան ուշադրութիւնը գրաւելով՝  պատշաճ ու գիտակից յարգանքի տուրք յայտնէ Սումկայիթի հակամարդկային քաղաքական ոճրագործութեան զոհ դարձած բազմահարիւր մեր անմեղ եղբայրներուն եւ քոյրերուն: 

Յարգանքը եւ անոնց յիշատակին պահպանումը բոլորիս սրբազան պարտականութիւնն է, մանաւանդ երբ կը գիտակցինք թէ այսօր ալ Թուրք-Ատրպեճեանական քաղաքական ձգտումները ո՛չ միայն պատմութիւնը գիտակցաբար կը խեղաթիւրեն, այլեւ Հայերը կը ներկայացնեն իբր «ցեղասպան» ժողովուրդ եւ կը սպառնան Հայաստանի եւ Հայաստանի բնակչութեան: 

ՏԱՃԱՏ Ծ. ՎՐԴ. ԵԱՐՏԸՄԵԱՆ

Լոս Անճելըս

Փետրուար 28, 2018

 

Print