St. Leon Church "Sound of Children" Summer Camp
Click Here to lean more

NEXT EVENT
16 June 2019
ԼՈՅՍԻ ՀԵՂԵՂԸ ՀՈԳԻՆԵՐԷՆ ՆԵՐՍ...
Published - 12 April 2019

Բառերը անբաւարար են լիարժէք գնահատականը տալու համար խորհրդաւոր այն երեկոյին, որը կեանքի է կոչուած Սրբոց Ղեւոնդեանց Մայր Տաճարի կամարներուն տակ, իւրաքանչիւր ամսուան առաջին Երկուշաբթիի երեկոյեան, երբ հաւատացեալներու խուռներամ բազմութիւն մը, երկիւղածութեամբ ծնկաչոք իրենց սրտէն բխած աղօթք մաղթանք կը բարձրացնեն առ Աստուած, որպէսզի լեցուին աստուածային լոյսով ու ճշմարտութեամբ։

Սրբոց Ղեւոնդեանց Մայր Տաճարի աղօթանուէր կամարներուն տակ կազմուած է հրաշալի աղօթքի ընտանիք մը, գլխաւորութեամբ՝ Թեմի Քրիստոնէական Դաստիարակութեան պատասխանատու՝ Մաշտոց Չօպանեանի, իր կողքին ունենալով Արժ. Տ. Սերովբէ Քհնյ Էյլէնճեանը, որոնք կ'առաջնորդեն հաւատացեալները աղօթքի, այլ խօսքով՝ Աստու¬ծոյ հետ մտերմիկ խօսակցութեան։

Որպէս ներկայ մը այս խորհրդաւոր պահուան մասնակից, հազար փառք կու տամ Աստուծոյ, որ աշխարհի խաժամուժէն կտրուելու պատեհ առիթը ունեցայ միանալու աղօթող հոգիներու հետ եւ միասնաբար ապրելու Աստուծոյ ներկայութիւնը եւ քալելու Քրիստոսի ուղեգծած խաչի ճանապարհէն, որ բոլորս կþառաջնորդէ դէպի Ճշմարիտ Լոյսը։

Սիրելի քոյրեր եւ եղբայրներ ի Քրիստոս, թող մեր քայլերը առաջնորդենք դէպի Աստուծոյ տունը, որպէսզի մեր հոգիներուն մէջ զգանք լոյսին հեղեղը։ Աստուածային լոյսն է այդ, որ իր մէջ կը խեղդէ չարը եւ մեզի կը պարգեւէ նոր կեանքին ճաշակը ի Քրիստոս։ Ամսուան այս աղօթահաւաքին ուժականութիւնը պէտք է զգանք, անկախ այն հանգամանքէն թէ ինչ տարիքի կամ պաշտօնի կը պատկանինք։ Աստուծոյ հրաւէրն է ուղղուած բոլորիս։ Բանանք մեր հոգիներու առագաստը դէպի Աստուած, որպէսզի մեզ բարձրացնէ դէպի աղբիւրը լոյսի։

Աղօթքի մէջ պահենք մեր կեանքը։ Չմոռնանք յաճախելու Եկեղեցի, որ Աստուծոյ Տունն է, եւ այդ Տունը՝ աղօթքի Տուն է։ Ահա այս գիտակցութեամբ շարունակենք առաջնորդուիլ, որպէսզի ոչ միայն մենք մնանք աղօթքի կեանքի մէջ, այլեւ՝ աղօթքով զօրացնենք միմեանց եւ լուսաւորենք մեր էութիւնը։

Ներկայ մը